Hime Ajiñ Myoko Ayu
Kápyo pa
Bilo Myoko anyañ hoka khiibo sote ilyi ho hime ajiñ atañ hii byai byalo ayu la, Āto Tajuñ, Dimpiir Tajuñ ka duliñ komi ayu yuka siine. Ayu la miji pa taka siila hime atañ myoko miiko lemba ho alyiñ dalyi ho soha du. Ho myoko miiko lemba hokii miji nii hime ako hiika khiibo ajiñ paka soha bo ako mi sebii la mo ka ude ho ingii kula ayu yuka siidu. Āto Tajuñ Byai Tajuñ mi hime ayu pa yudu.
Sitañ pa Áyu tii
Āto Tajuñ, Byai Tajuñ duliñ byo, beluñku, si Byai byalo ayu byo! Āto Tajuñ lu Byai Tajuñ lu huka oho pe? Āto Tajuñ mi dimper Tajuñ hiido, Āto Tajuñ, Byai Tajuñ mi dimper do, liiger do hiibii da. Āto Tajun niimpa yu dimper donii? ho liiger donii? Mo ja biilyo dimper mane cho, kolo dimper mane cho! Siilo niimpa pe dimper liiger donii du? Āto Tajuñ humi pe mihi pa lachi nii?
Āto Tajuñ huka oho hiikele - Āto Tajuñ Byai Tajuñ lu IIpyo Jumii Ui Juma ka oho cho hiido. Āto Tajuñ dimper donii, Iiiger donii si - Biinyi Arii mu’nii mi khinii khato la (Nyimuñ soto la) yuke, Siilo Tajuñ dimper donii, liiger donii. Āto Tajuñ ka mihi laniiñ si Rando Mado mi mihi la. Āyo Rando mado huka jaka oho pe? Hiike le. Arii Hintii mado ka oho. Āto Tajuñ ja Byai mibya byacha doyu ke, huko nelo hope hiika sa? Āto Tajuñ ka Byai patañ byalo pabiñ si, Byai soko byalo soko chogo sampo dogo doyu ke, Sogii tago sogo doyu ke. Āto Tajuñ Byai mibya pa huka nelo hope byacha nii? Chogo sampo si nii pe? Ngiilañ yanii si nii pe? Āto Tajuñ ka Byai mibya byacha kosi- Byai chotu ka chotu nello cho, Byalo cholo ka cholo nello ho cho. Chogo sampo si lako nanii cho, Ngiilañ yanii si pusuñ nanii cho. Āto Tajuñ kii Rando akhii si doliñ doyu ke, Miji pinta si doyu ke si no hokii pe du?
Rando akhii si ayo Rando Mado ka myoa giiniiñ cho (Milo ālyi hoka agii nii). Byai Tajuñ kii Byai sukuñ byalo sukuñ done byo, Byai lapañ done, Byai Taliñ ka subu Sasaa solyañ he hobii nii done. Byai kaji adañ solyañ chilii nii done. Byai sukuñ mi Byalo sukuñ mi Siichi chimu do, siibyo byomu biido. Byai sukuñ si nii pe, Byai lapañ si, Byai subu si nii pe? Byai ka sukuñ si Ō turla ke, Byai lapañ si pepu la pañ peja lapañ ke. Byai subu si kaji paka ke, adañ solyañ chilii niisi kaji punyu ke.
