Yabiñ Tamo

Yabiñ Tamo hu?

Yabiñ Tamo ka piigo si, ngunu Tanii ho nitiñ hormiñ nanii pa luko siinya du.

Ayu konyañ ho Yabiñ Tamo hala ako duto la. Tamo ano migiñ la, more ilyi kamyañ achu amyo ba'gii la miila miitii. Tamo ka uru ano aro tii. Moka abañ ako dutii hii tare ano aro tii, ude nelo penge dosu tii, aji lya'pyo ya nyima pa, ajo indo lasu ato mihi oho mi sangii la dusu tiinii. Tamo kii moka abañ mi yopa lala mi khiibe nyiya matii niiñ, mo ato átè bomi hela dusu tii. Hojalo, Tamo mo aha ho hela, "ngiika abañ tare ngiimi iche heñkiñ siido, ngo hii kane siidiñ siire ba'kañ siidu, ngiimi hangii ja bikama." Tamo aguñ lo lupe masu, hojalo mo, moka abañ iche mingo tiiko da aya tiido hala heñtii.

Yabiñ Tamo ka heru

Tamo more inko ingiñ adiñ la, siidiñ siire ano ba'la, mo lemba ano asañ diilañ kola da'tii. Momi kone abi lula, "Yabiñ Tamo more ine milo áchu amyo ako majalo ako ba'gii ba'gii duku", Tamo jije jipe ano migiñ tii.

Yabiñ Tamo ka abañ kii ude Nelo penge dosu lala aji lya'pyo nyima pa, miko ajo ila sii da'su tiinii. Moka anu Tamo mi ano heñsu lala, moka siidiñ siire ba'gii kula ka adiñ bilyi ho, moko "ra O" tare bisa nyima pa lyitii. Aha ano hempyo siido, hang bisa pa'sa kapa matii. Tamo siidiñ siire adiñ mi ato abañ mi bikañ siitii.

Yabiñ Tamo ka nīti abañ

Tamo ano migiñ siilyi niiñ, moka abañ mi siidiñ siire ba'kañ bisudo, ra O hala ronge tampa tañka matii. Tamo lula, "ngiika abañ mi ngo siidiñ siire adiñ mi bikañ siidu, ngiimi ra O ronge tare bika ma". "Abañ aro lyiso hempyo ma, ngo mingo abañ ako biika nañ". Hala lula Tamo mingo abañ ako mete tii. Ho Tamo, mingo miyu ako kapa tii, "ngo simi ke ngiika siidiñ siire adiñ mi bichi kunii, simi ke ngo abañ biichi kunii" hala hentii ku.

Ayu mada, Tamo more ilyi kiilyi niiñ. More hokii siidiñ dore ba'gii tiiku. Hiika adiñ mi tiibii la, Tamo hiika mingo boko jobi tii. Hiika mingo bo Tamo ka adiñ jobi niimi kapa lala, "paya aro pacho, ngiimi ka adiñ jobi dunii" hala lula la, mo mihi mi aga ra O rábi to hala lutii. Tamo ka mingo abañ paka buniiñ bo ano hempyo la, Tamo ka more ilyi ho, hulyi tembi do, O pinchu alii bi, po'na ho'bi dope ha, hala miitii. Yabiñ Tamo, ano hempyo la, "aye, mingo abañ halāñ po hendu nii?" hala ato ato mi lusu la, hempyo la da'tii.

Álo loye, Tamo more impa intii, hiika mingo bo abañ hii, momi hiira hulyi pere telii bi, O pinchu alii bila miitii.

Yabiñ Tamo mika heñje nii abañ

Tamo more ila dola, lembo so henjo biila intii, "ngiimi ngiika nīti abañ si ho, yo teñbi do, O piñchu alii bido. Si ngiimi ano loda heñdo. Hojalo, si ngiimi heñje la heñsu dope hadu?"

More ho Tamo moka giimya miiko ho āchi biikele siire hiruñ dore nii'bii tola dotii. Tamo heñdi lala, "ma ngiika mingo bo abañ si ngiimi jije heñsu dope hadu, hiimi kakama aya diima". Tamo, siire mi giimya aruñ ho atik tela, more yorda ho liñbii la, goro goro pa lula "Yabiñ Tamo mi giimya nii'khii tola doke, yasañ raro pagii nyala kutii ka, halu anyo koda yasañ papá diima ke."

Hoka yasañ pala da'nii atañ tapa lala, are are yasañ pagii nyaku la, lemba ho hara nyatii ku. Lemba ho abii kula Yabiñ Tamo ka abañ (jije ka abañ) ko āla luko tii. Tamo ka abañ hii, "mahuñ, Tamo mi giimya nii'khii tiiku koda, moka adiñ ba'bi konii bo abañ mi luko yusu lyilo" hala intii.

Simi ka kenii bo la lukò bò

1. Tage Laling (Author)
2. Tage Bida Gambo (Narrator).